Nanghulga sa ANS gisubay

CEBU, Philippines — Gimando ni Mayor Nestor Archival sa Cebu City Disaster Risk Reduction and Management Office (CCDRRMO) Cebu City Police Office (CCPO), ug uban pang hingtungdang mga opisina sa siyudad nga tabangan ang Department of Education ug mga tunghaan sa syudad samtang nagpadayon ang imbestigasyon sa online bomb threat sa Abellana National School niadtong Agosto 6, 2026.

Sumala pa sa incident report sa Dep-Ed-7, nakadawat ang ANS og alarma sa alas 9:00 sa gabie mahitungod sa mga hulga nga gipatik sa TikTok account gikan sa giingong usa ka Grade 9 student.

Ang mga mensahe naglakip sa hulga nga “pabuthon ko nang eskwelahan ninyo” ug “dungabon tamo igka Biyernes pagbantay lang mo.”

Tungod niini, gipatuman sa ANS ang ilang mga safety protocol sama sa pagpahigayon og Modular Distance Learning (MDL) kagahapon, Agosto 7.

Niresponde sab ang Philippine National Police (PNP) Station 2, uban sa Explosive Ordnance Disposal (EOD) ug K9 units, aron susihon ug siguruhon nga walay bomba sulod sa tunghaan.

Gipasa sab ang kaso ngadto sa PNP Anti-Cybercrime Group 7 aron masuta kung diin gikan ang hulga ug kung kinsa ang tag-iya sa social media account ug masubay pa ang mga kalihukan niiini sa online.

Gipatawag sa School Child Protection Committee ug Guidance Office ang mga ginikanan sa mga nalambigit nga tinun-an aron nga pormal nga mahinabi uban sa tabang sa Women and Children Protection Desk (WCPD).

 Pahugtan sab niini ang security protocols, pag-inspeksyon sa mga bag, pagposisyon sa mga gwardiya ug barangay tanod kung ibalik ang face-to-face classes.

Dili kini ang unang tunghaan nga nakadawat og hulga karong semanahuna. Lakip na niini ang University of Cebu- Banilad, Sibugay Integrated School sa Barangay Pung-ol Sibugay, Binaliw National High School, Mabini Integrated School, Agsungot Integrated School ug Guba National High School.

Giawhag ang mayor sa publiko nga likayan ang pagpakatap og pekeng impormasyon ug ang pagpanghulga sa social media aron malikayan ang kalibog ug kahadlok. — IBM BANAT NEWS