Binatilyo na rider tepok sa salpok
MANILA, Philippines — Isang 15-anyos na binatilyong rider ang nasawi habang sugatan naman ang backrider nitong 19-anyos na babae makaraang sumalpok sa barandilyang bakal sa tabi ng highway ang minamanehong motorsiklo sa Toledo City, Cebu noong Sabado.
Kinilala ang nasawing si Daniel Bordaje Samson habang sugatan ang babaeng angkas na si Mary Angel Garcia na kapwa walang suot na helmet.
Sa ulat ng Toledo City Police, kasalukuyang minamaneho ni Samson ang motorsiklo na wala umanong driver’s license at angkas si Garcia, galing sa Brgy. Poblacion na kasalukuyang binabaybay ang pakurbadang daan sa Brgy. Ibo ng lungsod nang mawalan ng kontrol sa manibela.
Sumemplang ang motorsiklo na sumalpok sa barandilyang bakal sa national highway kung saan tumilapon ang dalawa na kapwa nasugatan sa insidente.
Agad dumating ang mga rescuer at isinugod sa Toledo City General Hospital ang dalawa, subalit idineklarang dead-on-arrival si Samson habang nilalapatan ng lunas ang babae.
- Latest
