Arkiteks United nagpanikad na sa Aboitiz Cup
CEBU, Philippines — Ang Arkiteks United naghinam-hinam nang mopakita og aksiyon sa men’s open Division 2 sa 26th Aboitiz Football Cup karong weekend sa Dynamic Herb-Borromeo Sports Complex.
Ubos sa paggiya ni head coach Arnie Pasinabo ug sa assistant coach niyang si Michael Bonjoc, ang Arkiteks United ibandera sa kanhi mga players sa University Athletic Association of the Philippines (UAAP) ug Cebu Schools Athletic Foundation, Inc. (CESAFI).
Apil niini sila si Zidane Alanquihan, Joshua Genson, Kiann Partosa, ug Julian Cabatingan (University of Sto. Tomas), Nathan Bajarias ug Leonel James Fernandez (University of San Carlos), Sydney Kamichi ug Neilson Villaver (Sacred Heart School-Ateneo de Cebu), ug Lance Alkuino ug Cyril Calo (Don Bosco Technical College).
Sa wala pa mitapon sa UST juniors, si Partosa gipasidunggan nga Most Valuable Player sa Under 15 division sa 19th Aboitiz Cup sa dihang nagduwa pa siya alang sa Ateneo de Cebu niadtong 2017.
Uban ni Vincent Ace Duenas isip team captain, ang ubang mga miyembro sa Arkiteks United mao sila si Christopher Martinez, Oliver Abarquez, Aaron Choachuy, Fretz Remulta, Mikko Palacio, Leonel Fernandez, Zeus Amarga, Glenn Alonso, Daryll Chavez, Aldwin Pandaan, Mark Aguirre, Paolo Perez, ug Mel Rubillos. Si Jhojo Partosa maoy ilang team manager.
Ang mga Arkiteks nagrupo uban sa Lapu-Lapu FC, University of the Philippines (UP) Cebu, Sportsgen FC, Sporting FC, ug DB Magone, nga maoy ilang sangkaon sa una nilang duwa karong Domingo, Agosto 2.
- Latest
