Alas Women kasado na vs Vietnam
MANILA, Philippines — Babanderahan nina team captain Jia De Guzman, Eya Laure, Bella Belen, Vanie Gandler, Erika Santos at Alyssa Solomon ang Alas Pilipinas sa pagsabak sa 6th Southeast Asia (SEA) V Cup Women’s Volleyball Week 1 sa Hanoi, Vietnam.
Dumating na kahapon ang koponan ni Japanese coach Taka Minowa sa Vietnamese capital bago ang pagbubukas ng torneo bukas sa Dong Anh Gymnasium.
Ang iba pang miyembro ng Alas Women ay sina Fifi Sharma, Mars Alba, Thea Gagate, Dawn Macandili, Jen Nierva, Dell Palomata, Jasmine Jazareno, Nina Ytang at National University standouts Celine Marsh at Vange Alinsug.
Hindi kasama sina collegiate stars Angel Canino at Amie Provido ng De La Salle University, reigning UAAP Best Libero Shaira Jardio ng NU at PVL Rookie Draft No. 1 overall pick Lams Lamina ng Galeries Tower.
Ang 14 players sa 16-player lineup ang isasalang ng bawat koponan sa SEA V Cup Week 1 at Week 2, habang ang dalawa ay magsisilbing reserve.
Unang makakatapat ng Alas Women sa SEA V Cup Week 1 ang host Vietnam kasunod ang Thailand sa Sabado at ang Indonesia sa Linggo.
Ang SEA V Cup ay bahagi ng paghahanda ng Alas Women para sa 20th Asian Games sa Aichi-Nagoya, Japan sa Setyembre 19 hanggang Oktubre 4.
- Latest
