Liderato sinolo ng Road Warriors

MANILA, Philippines — Naisuko ng NLEX ang itinayong 25-point lead sa third period, ngunit hindi ang panalo.

Sinagasaan ng Road Warriors ang Bermen, 110-96, para dumiretso sa ikaapat na sunod na panalo sa PBA Season 50 Go­vernors’ Cup kahapon sa Smart Araneta Coliseum.

Muling sinolo ng NLEX ang liderato sa Group A sa kanilang 4-0 record, habang laglag ang San Miguel sa 3-1.

Kumolekta si balik-import DeQuan Jones ng 27 points at 10 rebounds para sa Road Warriors at may 24, 15, 14 at 13 markers sina Schonny Winston, Tony Semerad, Robert Bolick at Robbie Herndon, ayon sa pagkakasunod.

“I’m really proud of our guys. I think anytime you play San Miguel, with all those championship experience, it’s always a great test for a young team,” ani coach Jimmy Alapag. “But I thought we were very resilient, especially in the second half.”

Pinamunuan ni balik-import George King ang Beermen sa kanyang 31 points.

Kaagad kinuha ng NLEX ang 30-19 abante sa huling minuto ng first period mula sa three-point shot ni Herndon bago ito naputol ng SMB sa 27-30 sa pagsisimula ng second quarter.

Isang 14-0 atake ang ginawa ng Road Warriors tampok ang dalawang triples nina Winston at Bolick at four-point shot ni Jones para muling makalayo sa 44-27 sa 8:29 minuto nito.

Tuluyan nang nabaon ang Beermen sa 23-point deficit, 41-64, matapos ang tres ni Semerad sa huling 23 segundo bago ang halftime.

Ang triple ni Semerad ang nagpalobo sa kalamangan ng NLEX sa 77-53 patungo sa kanilang 85-60 pag-iwan sa San Miguel sa 4:47 minuto ng third period.

Ngunit nakabangon ang Beermen sa likod ni Trollano para makalapit sa 84-92 sa 7:31 minuto ng fourth quarter.

Ang 4-pointer ni Bolick at triple ni Herndon ang nag-angat sa Road Warriors sa 99-84 sa 6:23 minuto ng laro.

Huling naghamon ang San Miguel sa 93-104 mula sa layup ni Jericho Cruz sa 2:42 minuto.