Hotshots sumampa na sa win column

MANILA, Philippines — Nakaisa na sa wakas ang Magnolia matapos kuryentehin ang Meralco, 112-98, sa PBA Season 50 Governors’ Cup kahapon sa Smart-Araneta Coliseum.

Maagang kumawala ang Hotshots subalit kailangang salagin ang ilang balikwas ng Bolts sa second half tungo sa 1-2 kartada sa Group B ng double-round robin eliminations tampok ang Top 4 teams lang na makakapasok sa quarterfinals kontra sa Group A.

Tumabo ng double-double na 26 puntos at 12 rebounds si KJ Buffen sahog pa ang 5 rebounds habang may 20 puntos, 11 rebounds, 2 assists, 2 steals at 2 tapal si Zavier Lucero.

Bayanihan ang Hotshots upang makaiwas sa 0-3 kumunoy nang mag-ambag din sina Ian Sangalang, Mark Barroca at Jerom Lastimosa, ayon sa pagkakasunod.

“We realled needed this win. Napaka-importante ng panalo na ito para sa amin. I hope ito na ‘yung hinihintay namin na momentum kasi Big 3 ‘yung mga kalaban namin. Rain or Shine next tapos back-to-back Ginebra. Credits to my players, they res­ponded well,” ani playing head coach LA Tenorio.

“We just displayed composure and nag-tiwala kami sa sistema namin. Hindi kami nag-give up kahit anong run ng Meralco kasi napaka-important sa amin ito. Kung natalo kami dito, mahihirapan na kaming bumangon,” dagdag naman ni Best Player of the Game na si Sangalang.

Hindi lumamang maski isang beses ang Bolts subalit makailang ulit kumatok sa pinto ng Hotshots, pinakamalapit sa 63-65 sa third quarter matapos ang tres ni Antonio Hester.

Subalit iyon na ang naging huling sigaw ng Meralco nang magtulong sina Lucero, Sangalang at Barroca kasama si Buffen lalo na sa fourth quarter kung saan sila umariba.