Gipatay sa anak
CEBU, Philippines — Patay ang usa ka 51-anyos nga inahan human giingong gidunggab sa iyang kaugalingong anak sa Sitio Mahayahay, Barangay Sonog, San Francisco, Camotes, alas 10:45 sa buntag niadtong Martes, Hulyo 21.
Ang biktima giila sa alyas "Melody," usa ka Barangay Utility Worker, residente sa maong lugar. Ang suspetsado mao ang iyang 29-anyos nga anak nga giila sa alyas "Kyle," nga residente usab sa maong barangay.
Sumala sa San Francisco Municipal Police Station, naabtan nila ang biktima nga nagbuy-od sa bakanteng luna duol sa ilang balay samtang ang suspetsado wala na diha.
Base sa inisyal nga imbestigasyon, nasuko ang suspetsado sa iyang inahan kay miadto sa Rural Health Unit aron mangayo og tabang may kalabotan sa iyang kahimtang sa pangisip.
Sa pagpauli sa biktima, giingong gikuha sa suspetsado ang usa ka kutsilyo sa kusina ug gigukod ang iyang inahan ug sa dihang iyaha ning naabtan gidunggab niya ni sa makadaghang higayon.
Gidala pa nila ang biktima sa Ricardo L. Maningo Memorial Hospital apan gideklarar nga patay na pag-abot sa tambalanan.
Human sa insidente, gilusad dayon sa kapulisan ang hot pursuit operation nga miresulta sa pagdakop sa suspetsado sa Sitio Pagnahian, Barangay Sonog.
Padayon na karon ang imbestigasyon sa kapulisan samtang giandam ang tukmang kaso nga ipasaka batok sa suspetsado. IBM BANAT NEWS
- Latest
