Presyo sa lana mosaka na usab karon

CEBU, Philippines — Gikatahong mosaka na usab ang presyo sa mga produktong petrolyo sugod karong adlawa diin ang diesel ug kerosene adunay double digit nga pagsaka, matud sa Department of Energy (DOE) kini tungod sa nagpadayon nga panagbangi sa Middle East.

Atol sa virtual press conference kagahapon, gipahibalo ni DOE Secretary Sharon Garin nga nibalik ang departamento sa gitakdang pricing mechanism ug wala na gamita ang price range nga gigamit sa niaging mga semana.

Ubos sa bag-ong adjustment, nisaka ang gasolina og hangtud sa ?3.65 kada litro, diesel, ?10.68 kada litro ug kerosene, ?11.77 kada litro. Giingon ni Garin nga dili tugotan ang mga oil company nga molapas sa gitakdang maximum adjustment.

Matud ni Garin nga ang pagsaka sa presyo gumikan kini sa mga panghitabo sa Middle East nga nagpasaka usab sa presyo sa lana sa kalibutan.

Gipasabot ni Garin nga bisan dili makontrolar sa gobiyerno ang presyo sa lana sa kalibutan mahimo nila’ng ipatuman ang balaod ug bantayan ang pagsunod sa mga oil company.

Naglaom si Garin nga dili kini molungtad ug dili mahimong sama sa grabeng pagsaka sa presyo sa niaging mga oil crisis.

Gipasalig ni Garin nga igo ang suplay sa petrolyo sa nasud diin ang inventory karon tukma kini sa 46 ka adlaw diin mas labaw sa 30 ka adlaw nga minimum requirement sa balaod.

Ang inventory sa gasolina tukma sa 43 ka adlaw, diesel halos 46 ka adlaw, kerosene halos 140 ka adlaw, jet fuel 82 ka adlaw, fuel oil halos 29 ka adlaw, ug LPG 34 ka adlaw.

Matud usab ni Garin nga ang panagbangi ug pagpamomba sa Middle East nakaapekto sa supply chain ug nagpataas sa presyo sa lana diin labaw sa 80 porsyento sa petrolyo sa Pilipinas gikan sa Middle East. (BANAT NEWS)