Cambodia sinikwat titulo sa SEA V Cup

CANDON CITY , Philippines — Binu­laga ng Cambodia ang pinapaboran na Indonesia matapos paluin ang 25-23, 28-26, 23-25, 22-25, 15-11 panalo at sikwatin ang titulo sa 6th Southeast Asian Volleyball Cup (SEA V Cup)  men’s division na nilaro sa Candon Arena, Ilocos Sur  kagabi dito.

Ipinaramdam ng Cambodia ang kanilang lakas sa unang dalawang sets matapos nilang makipagsabayan sa 2025 SEA V. League second leg champion Indonesia at sikwatin ang makapigil hiningang panalo.

Nagpatuloy ang mainit na bakbakan ng Cambodians at Indonesians sa third frame kaya naman nagkatalo ulit sa dalawang puntos kung saan ay nagtagumpay ang huli, 23-25 para makahirit sila ng fourth set.

Mahigpit pa rin ang na­ging labanan sa fourth frame dahil halos hindi nagkakaiwanan, lumamang ng dalawa ang Cambodia, 18-16 pero kinapitan ulit ito ng Indonesia at tinabla ang iskor sa 18-all.

Naging matatag ang Indonesia sa dikdikang labanan kaya naman nakuha nila ang panalo sa set 4 para makapuwersa sila ng deciding fifth set.

Samantala, inangkin ng last year’s first leg champion Thailand ang bronze medal matapos nilang kalusin sa apat na sets ang Vietnam, 23,25, 30-28, 25-20, 28-26.