Pacquiao-Mayweather 2 ililipat sa 2027

MANILA, Philippines — Matutuloy din ang rematch nina eight-division world champion Manny Pacquiao at undefeated American fighter Floyd Mayweather Jr. na target ganapin sa unang bahagi ng 2027.

Nakansela ang rematch nina Pacquiao at Mayweather na gaganapin sana sa Setyembre dahil sa ilang aberya sa kampo ng American boxer.

Ngunit sinabi ni MP Promotions CEO Jas Mathur na inaayos na ng kampo ni Mayweather ang mga gusot upang matuloy ang laban nito sa Pinoy champion.

“The Floyd fight that everybody wants to know about, that fight is being postponed,” ani Mathur.

Target na ganapin ang rematch sa Enero ng susunod na taon. Ngunit wala pang eksaktong petsa na inilatag para sa naturang bagong schedule.

“Right now the new tentative date that we have is going to be at the end of January but there’s still other technicalities that need to be addressed before and based on other contractual obligations that Floyd has. So those need to be met in order for this to happen,” ani Mathur.

Orihinal sanang idaraos ang Pacquiao-Mayweather 2 sa Setyembre 19 sa The Sphere sa Las Vegas, Nevada ngunit naudlot ito.

Isa sa mga dahilan ang pagkakasangkot ng kampo ni Mayweather sa ilang demanda dahil sa iba’t ibang kadahilanan kabilang na ang problema sa kontrata.

Gayunpaman, inaayos na ng Mayweather camp ang lahat para masigurong matuloy ang rematch na inaasahang magiging blockbuster na naman.

Matatandaang tumabo sa takilya ang unang paghaharap ng dalawa kung saan naitarak ni Mayweather ang unanimous decision win noong 2015.