Elasto Painters bugbog sa Bossing
MANILA, Philippines — Maagang kinontrol ng Blackwater ang laro patungo sa 131-108 pagbugbog sa Rain or Shine sa PBA Season 50 Governors’ Cup kahapon sa Ynares Center sa Montalban, Rizal.
Nagpakitang-gilas kaagad si import Kentrell Barkley sa paghakot ng triple-double na 29 points 15 rebounds at 10 assists para sa 1-0 baraha ng Bossing sa Group B.
Umiskor si Fil-Am guard Sedrick Barefield ng 24 markers at may 22 points si backup RK Ilagan para sa tropa ni coach Patrick Aquino na kumolekta ng 58 boards at 24 assists.
“We need a lot more work to be done, I know this just the start. It’s a long, long way to the conference,” ani Aquino. “We’re just happy that we won our first game, it’s a good start that’s what we want.”
Kumolekta si balik-import Aaron Fuller ng 38 points at 15 rebounds sa panig ng Elasto Painters.
Nagtala lamang ang Blackwater ng 2-10 marka sa nakaraang PBA Commissioner’s Cup kasama rito ang 56-point loss, 95-151, sa Rain or Shine na naging ‘most lopsided win’ sa league history.
Sinimulan ng Bossing ang laro sa 21-8 patungo sa 36-25 abante sa pagsasara ng first period tampok ang 18 points ni Barkley.
Lalo pang naiwanan ang Elasto Painters sa halftime, 56-72, at tuluyan nang nabaon sa isang 34-point deficit sa third quarter.
Ang free throw ni CJ Austria ang nagbigay sa Blackwater ng 123-96 lead sa huling 3:28 minuto ng fourth period.
- Latest
