The Blazing Torch and True Edge Cup pickleball nagmalampuson

CEBU, Philippines — Nagmabungahon ang Cebu Pickleball Open Tournament 2026:The Blazing Torch and True Edge Cup nga gipasiugdahan sa Antorcha De La Libertad Lodge No. 2 and Espada De Rectitud Lodge No. 3 sa The Sovereign Grand Lodge of Visayas and Mindanao-Gran Logia Soberana del Archipielago Filipino (TSGLVM-GLSdAF) ning bag-ohay pa lamang. Matud pa ni Hermano Allan Delantar sa TSGLVM nga ilang nakab-ot ang tulo nila ka tumong sa pagpahigayon ning mahinungdanong inisyatiba nga mao ang pag-ugmad sa panaghigalaay ug panag-uban, pagsuporta sa mga kawanggawa ug pagpalambo sa pickleball isip usa ka nagtubo nga isport sa Sugbo.

Si Delantar midugang nga ang bahin sa kita ilang idonar sa usa ka charity o grupo nga motabang sa katawhan nga pilion sa mga organizers ug aprobahan sa TSGLVM–GLSdAF.

Sa laing bahin, sila si Bombie Ledesma ug Karlo Ledesma maoy nangu sa mga mananaog sa torneyo nga nahimong posible tungod sa suporta nilang Howard Lazarte sa Pickle Rank, Mhark Anthony Lao, Clint Libarnes, Dave Baldoza sa ADB Var Rental, ug Bola Pickleball PH.

Ang mga Ledesma mipatigbabaw nilang Alfredo Arradaza III ug Eliezer Yac aron paglugwa nga kampiyon sa men's doubles open.

Sila si Sheina Martinez ug Selena Monique Olo milangkat sa korona sa women's doubles open human gipukan sila si Karyll Salas ug Jeanette Eduave. Aduna hinoon gihapoy angay nga ikalipay si Salas kay gisakmit niya ang mixed doubles title uban ni Dwayne Constantine Balibalos human ilang gipildi sila si Kaye Layosa ug Janssen Bryle Ricana.

Sa beginners category, sila si Marshy Vidal ug Justine Cañete nanghawod sa mixed doubles human gibuntog sila si Louise Marvi Pinos ug Ken Harvey Pinos, sila si Kent Homer Gongob ug John Philip Pogoy mipayaka nilang Ken Harvey Pinos ug Caesar Ian Ortega aron paghari sa men's doubles, samtang sila si Niña Sequino ug Lyka Campugan midominar sa women's doubles human gipakaging sila si Karissa Lopez ug Rizalda Maunes.