Canino thankful sa Asiad spot
MANILA, Philippines — Malaki ang pasasalamat ni Angel Canino ng De La Salle University na mapasama sa national pool na isasabak sa Asian Games sa Setyembre sa Nagoya, Japan.
Isa si Canino sa 22 players na pinangalanan ng Philippine Olympic Committee (POC) para maging bahagi ng Alas Pilipinas pool sa Asian Games.
“I’m super grateful. Sobrang blessed ako na paglabas ng lineup I was part of it,” ani Canino.
Umaasa si Canino na magiging maayos na ang lagay ng Philippine volleyball sa bansa kung saan nanawagan ito ng pagkakaisa upang mas lalo pang umunlad ang programa para sa sport.
Hindi ito ang unang pagkakataon na masisilayan si Canino suot ang national team jersey dahil naglaro na rin ito sa mga nakalipas na torneo partikular na sa 2025 Southeast Asian Games sa Bangkok, Thailand.
Makakasama ni Canino sa Asian Games sina Jia De Guzman, Justine Yliyzeth Jazareno, Jennifer Nierva, Dawn Nicole Catindig, Mhicaela Belen at Eya Laure.
Pasok din sa lineup sina Thea Gagate, Fifi Sharma, Vanessa Gandler, Alleiah Jan Malaluan, Amie Provido, Nina Ytang, Janette Panaga, Erika Santos at Arah Panique.
Nasa listahan din sina Marionne Angelique Alba, Maria Angelica Cayuna, Shaira Jardio, Dell Palomata, Shaina Marie Nitura at Alyssa Jae Solomon.
Gagabayan ang tropa ni Japanese coach Taka Minowa, asawa ni Jaja Santiago at naging coach ng Nxled.
- Latest
