476 ka police trainees nigradwar sa ilang training

CEBU, Philippines — Mikabat sa 476 ka police trainees ang gipasidunggan sa ilang graduation sa Public Safety Basic Recruit Course (PSBRC) Batch 2025-01 “Sinag-Anib” atol sa closing ceremony nga gipahigayon sa Regional Training Center (RTC) 7, Camp Jesse M. Robredo, Barangay Jugan, Consolacion, Cebu, niadtong Martes, Hunyo 30, 2026.

Ang seremonya gipangulohan ni Police Brigadier General Arnold E. Abad, regional director sa Police Regional Office 7 (PRO-7), isip guest of honor ug keynote speaker.

Sa kinatibuk-an, ang graduating class gilangkuban sa 427 ka lalaki ug 49 ka babaye nga malampusong nakahuman sa higpit nga recruit training program nga nagtudlo kanila sa kahibalo, kahanas, disiplina ug mga mithi nga gikinahanglan sa pag-alagad isip mga polis.

Atol sa seremonya, gihatagan usab og Certificate of Merit ug Medal ang tulo ka labing maayo nga trainees tungod sa ilang talagsaong academic ug training performance. Nangu si Patrolwoman Althea June A. Roa nga adunay 95.15 porsiyento nga overall rating, gisundan ni Patrolman Kevin B. Gomez nga adunay 94.64 porsiyento, ug si Patrolman Mathy Quilo Lariba Jr. nga adunay 94.51 porsiyento.

Sa iyang mensahe, gipadayag ni Abad nga ang pagsulod sa Philippine National Police (PNP) dili lamang usa ka trabaho kondili usa ka tibuok kinabuhi nga panawagan sa pag-alagad sa Diyos, nasud ug katawhang Pilipino.

Matud pa niya, ang pagsul-ob sa uniporme sa PNP usa ka pribilehiyo nga angay paningkamotan pinaagi sa disiplina, katakus ug maayong pamatasan, ug ang matag polis gilauman nga magpabiling matinud-anon, adunay integridad, propesyonal ug responsable sa iyang katungdanan.

Gipasabot usab sa regional director nga ang matag nigradwar nagdala na karon sa ngalan ug dungog sa Philippine National Police, busa kinahanglan nilang panalipdan ang pagsalig sa publiko pinaagi sa matarong ug matinud-anong pagserbisyo.

Gipasidan-an usab niya ang mga bag-ong polis nga walay luna sa organisasyon ang korapsyon, pag-abuso sa katungdanan, pagkadili matinud-anon ug bisan unsang lihok nga makaguba sa pagsalig sa katawhan, ug nga ang mosupak sa ilang panumpa manubag ubos sa balaod. Gidasig usab niya ang mga nigradwar nga andamon ang ilang kaugalingon sa mga sakripisyo nga kauban sa pagkapolis, samtang gipasalamatan niya ang mga pamilya ug mga minahal nga nagpadayon sa paghatag og suporta hangtod sa ilang kalampusan.  MEL BANAT NEWS