Dybantsa No. 1 pick ng Wizards sa NBA Draft
NEW YORK — Hinirang ng Washington Wizards si AJ Dybantsa bilang No. 1 overall pick ng 2026 NBA Rookie Draft sa first round kahapon.
Ang 6-foot-9 na si Dybantsa ang naging top scorer sa kanyang nag-iisang season sa US NCAA para sa Brigham Young University Cougars.
Kumamada ang 270-pound forward ng average na 25.5 points tampok ang isang 43-point effort na sumira sa BYU freshman scoring record.
“Obviously this night is just a celebration of all the hard work I’ve done in the past, and so now I’m going to celebrate,” sabi ni Dybantsa.
Ikinukumpara si Dybantsa kay Phoenix Suns star Kevin Durant na kanyang favorite player.
Ito ang ikatlong pagkakataon na nakuha ng Washington ang No. 1 overall pick matapos sina center Kwame Brown noong 2001 at point guard John Wall noong 2010.
Si Darryn Peterson ng Kansas ang nakuhang No. 2 pick ng Utah Jazz kasunod sina No. 3 Cameron Boozer (Memphis Grizzlies), No. 4 Caleb Wilson (Chicago Bulls), No. 5 Keaton Wagler (Los Angeles Clippers) at No. 6 Mikel Brown Jr. (Brooklyn Nets).
Kinuha ng Sacramento Kings si Darius Acuff Jr. bilang No. 7 pick at sina No. 8 Kingston Flemings (Atlanta Hawks), No. 9 Morez Johnson Jr. (Dallas Mavericks), No. 10 Yaxel Lendeborg (Golden State Warriors) at No. 11 Aday Mara (Oklahoma City Thunder).
Idaraos ang second round ng NBA Draft ngayon.
- Latest
