P1 milyong shabu nasakmit
CEBU, Philippines — Kapin P1.21 milyon nga kantidad sa gituohang shabu ang narekober sa kapulisan samtang tulo ka gituohang nalambigit sa ilegal nga drugas ang nasikop sa managlahing buy-bust operations sa Talisay City ug Cebu City niadtong Hunyo 18 ug 19, 2026.
Ang labing dako nga nakumpiska nga ilegal nga drugas gikan sa operasyon sa City Drug Enforcement Unit sa Talisay City Police Station sa Sitio Kolis, Barangay Tangke, Talisay City niadtong gabii sa Hunyo 19.
Nasikop sa maong operasyon ang usa ka High-Value Individual (HVI) nga nakuhaan og daghang paketeng gituohang shabu nga adunay gibana-banang gibug-aton nga 165 gramos ug adunay Standard Drug Price nga P1,122,000.
Narekober usab sa mga operatiba ang marked money nga naglangkob sa usa ka tinuod nga P1,000 bill ug usa ka tinuod nga P500 bill, dugang P1,500 nga gituohang halin sa ilegal nga droga ug usa ka itom nga sling bag nga gigamit isip sudlanan sa kontrabando.
Samtang P204,000 sab nga balor sa gidudahang shabu ang nasakmit gikan sa usa ka 46-anyos nga gidudahang tigpayuhot og illegal nga drugas sa buy-bust operation sa RPDEU7 operatives ug Police Station 11 sa Barangay Mambaling, Cebu City.
Ang operasyon gihimo kagahapon sa kadlawon nga niresulta sa pagkasikop sa usa ka alyas "Junjun," nga nakuhaan og 30 gramong gidudahang shabu.
Samtang, duha usab ka drug suspects ang nasikop laing buy-bust operation nga gipahigayon sa Cebu City Police Office.
Ang mga sakop sa Police Station 1 nihimo og operasyon sa Barangay T. Padilla ug nasikop ang usa ka suspetsado ug narekober gikan kaniya ang gibana-banang walo ka gramong gidudahang shabu.
Sa laing operasyon sa sayong bahin sa Hunyo 19 nadakpan sab sa mga sakop sa Police Station 7 sa Barangay Bulacao ang usa ka drug personality ug nakuhaan og 5.16 gramong shabu.Tanang dinakpan pasakaan og kasong paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002.(BANAT NEWS)
- Latest
