EDITORYAL — Trabaho namo

Sa katapusan nahigmata na gyud ang Senado kagahapon. Nakabalik na gyud sila sa trabaho human nga nibutho ang kadaghanan nila sa special session nga gipatawag ni Presidente Ferdinand Marcos Jr.

Kung mahinumdoman, nagkaguliyang ang Senado sa nanglabay nga mga adlaw gumikan sa inilogay sa liderato. Maayo nalang sab nga wala na magsupak-supak pa si Sen. Alan Peter Cayetano sa pagtangtang kaniya isip Senate President.

Opisyal na nga Senate President si Senador Win Gatchalian human nakompleto ang 13 ka botos para paginstalar kaniya sa maong posisyon.

Nabahin na sab og balik ang mga committee chairmanships nga motuki sa mga nagkadaiyang pulos importanteng mga balaudnon.

Partikular ani ang mga priority bills nga gustong mapasar ni Marcos tungod kay dako kaayo og matabang sa dinaliang panginahanglan sa mga Pilipino karong mga panahona.

Ang kaguliyang sa Senado nakita sa katawhan ug nabatyagan sa kinaubsan ang epekto ana.

Maayo nalang nga naminaw na ang uban kanila sa tingog sa katawhan. Wala sila gibotaran para molingkod sa maong posisyon para mamolitika o para magpasikat.

Kay kung kamahoan lang o antigohay isip usa ka senador ang hisgutan, dili tanang senador karon diha sa Senado ang angayan sa maong posisyon. Apan kay gibotaran man sila sa ilang supporters, motrabaho unta sila og tarung.

Sa makausa pa, magbaton unta og kaikog ang mga Senador sa katawhan, nga dili gamiton ilang posisyon para sa pag-abante sa ilang personal nga interes, interes sa ilang political parties o interes sa para sa mga indibidwal lamang.

Unta magpadayun na kini hangtud matapos ang 20th Congress o sa 2028 nga walay kaguliyang. Kay ang alkanse ana walay lain kondili ang mga Pilipino nga maoy namotar kanila diha sa ilang mga pwesto.