Maayong pamatasan

Nausab na bitaw gyud ang batasan karon sa kabatan-onan.

Daghan na kaayo sa atong kabatan-onan karon nga wa na mosunod sa batasan sa ilang mga ginikanan, ug sa ilang mga apohan. Sa laktod, kuwang na sila sa maayong pamatasan.

Nganong naingon man niini? Posible, nagkuwang ang ilang mga ginikanan pagtudlo ngadto sa ilang mga anak sa maayong pamatasan, ilabi na ngadto sa mga labaw nilang og edad.

Bisan gani sa probinsya, sa mga bukirang barangay, talagsa ka na lang makasugat nga dunay mga bata nga mangatahuran ug moingon “maayong gabii Ma, maayong gabii Lolo” kon gabii na.

Kami kaniadto, kon duol ka sa lungsod ug madungog nimo ang bagting sa kampanaryo, o kaha madungog nimo sa radyo ang angelus, moduol dayon mi sa among ginikanan og moingon “maayong gabii Pa, Ma.”

Kon molakaw mi, ug dunay masugatan nga hamtong na og pangedaron, moingon gyud mi nga “Maayong udto, Maayong hapon, Maayong gabii.”

Pero karon wa na gyud kaayo ko makakita niining mao nga batasan sa mga batan-on. Swerte ko nga ang akong mga anak, kon molakaw sila, ug kon moabot mi gikan sa lakaw, mo-Amen gyud sila og mo-kiss.

Kaniadto, dili gyud mi motawag direkta sa ngalan sa mga tawo nga maguwang kaayo namo’g edad. Naa gyud na ang pagtahod, pagtawag og Tiyo, Tiya, bisan ug dili gyud igsuon sa among ginikanan.

Ang mga tiguwang tawgon namo og Lolo, Lola bisan dili sila mga amahan sa among ginikanan. Kini tungod sa pagtahod.

Kini maoy unod sa privilege speech ni Provincial Board Member Celestino Martinez III nga iyang gihimo atol sa sesyon sa Cebu Provincial Board.

Daghan sa kabataan karon, yano-yano na lang nga motubag-tubag sa ilang mga ginikanan. Resulta, daghan kanila ang mahitumpahawak sa kadaotan, ug midagsang ang gitawag og teenage pregnancy.

Gusto ni Martinez nga ang tanang opisyal sa kabarangayan sa tibuok Sugbo, mohimo unta og paagi nga mahibalik ang maayong mithi sa mga batan-on – ang pagkamatinahuron.

Suportahan nato si Board Member Martinez aron magmalampuson ang iyang tinguha. Kitang mga ginikanan, maoy unang motudlo og maayong pamatasan sa atong mga anak.

Kon sugdan nimo ang pagtudlo og maayong pamatasan sa mga bata sa gagmay pa sila, magtubo sila nga nindot og batasan. Sa ato pa, naa ra gyud kini sa mga ginikanan.

Nakabantay ba mo nga kon ang mga ginikanan gani hilig kaayo nga mosinggit kon mangasaba, mosunod usab ang ilang mga anak. Kon ang ginikanan hinay nga manulti bisan og nasuko na, may morespito pa gani kanila ang ilang mga anak.