2 senior todas sa SUV crash

MANILA, Philippines — Dalawang senior citizens ang nasawi habang apat ang nasugatan matapos ang kanilang sinasakyang Sports Utility Vehicle (SUV) ay nahulog sa isang sapa na dadalo sana sa death anniversary ng misis ng driver sa Barangay Santa Cruz, Badoc, Ilocos Norte, noong Biyernes ng gabi.

Ang isang senior citizen ay idineklarang dead-on- arrival sa Sinait District Hospital habang ang isang 74-anyos na lola ay binawian naman ng buhay sa Mariano Marcos Memorial Hospital and Medical Center.

Sa imbestigasyon ng pulisya, alas-6:25 ng gabi noong Biyernes nang mangyari ang sakuna sa kahabaan ng national highway sa nasabing bayan.

Nabatid na minamaneho ng 69-anyos na kulay abong Toyota Fortuner na taga Langangilang, Abra nang maidlip ito bunsod upang mawalan ng kontrol sa manibela.

Bunga nito, tuluy-tuloy na bumulusok sa sapa sa tabi ng highway ang SUV na ikinasawi ng dalawang biktima habang sugatan naman ang driver at apat pang katao.

Nabatid ang mga biktima ay magkakamag-anak na galing Abra ay patungo sana sa Cagayan para dumalo sa death anniversary ng misis ng driver ng mangyari ang trahedya.

Isinasailalim pa ng mga otoridad sa masusing imbestigasyon ang kasong ito.