Knicks amoy na NBA crown
NEW YORK — Ipinasok ni OG Anunoby ang isang tip in sa huling 1.2 segundo mula sa mintis na three-point attempt ni Jalen Brunson para kumpletuhin ang 107-106 pagresbak ng Knicks sa San Antonio Spurs sa Game Four at ilista ang 3-1 lead sa NBA Finals.
Kinailangan ng New York na bumangon mula sa isang 29-point deficit sa third quarter para talunin ang San Antonio.
Bumanat si Brunson ng 36 points at may 33 markers si Anunoby para sa pagresbak ng Knicks mula sa naunang kabiguan sa Spurs sa Game Three.
“I told OG as big, as strong, as athletic as he is, he’s got to be a monster on the offensive glass tonight,” sabi ni New York coach Mike Brown sa paglusot nila sa San Antonio.
May pagkakataon ang Knicks na makopo ang kampeonato matapos maghari noong 1973 sa pagdaraos ng Game Five sa Linggo sa balwarte ng Spurs.
Humakot si Victor Wembanyama ng 24 points at 13 rebounds, ngunit nagtala ng mahinang 9-for-25 field goal shooting para sa San Antonio na nakahugot kay Fil-Am rookie guard Dylan Harper ng 21 points.
“I think it began before the fourth quarter,” wika ng 7-foot-4 na si Wembanyama sa kanilang pagkulapso. “I can’t really explain it right now. I don’t know. ... We clearly weren’t the most hungry in the second half.”
Nagdagdag sina De’Aaron Fox at Devin Vassell ng tig-18 markers.
Ipinoste ng Spurs ang 81-52 kalamangan sa 9:40 minuto sa third quarter.
Ngunit unti-unting nakabalik sa laro ang Knicks sa pangunguna nina Brunson at Anunoby para agawin ang panalo.
Dalawang free throws ang naimintis ni Wembanyama sa huling 1:47 minuto ng fourth period kung saan angat ang Spurs sa 104-103.
- Latest
