Wembanyama masaligon sa Spurs nga dali makabangon

CEBU, Philippines — Ang bitoon sa San Antonio nga si Victor Wembanyama malaumon nga ang Spurs makabawi dayon gikan sa ilang pagkahagba sa mga kamot sa New York Knicks sa Game 1 sa NBA Finals.

Ang Spurs misukarap human miposte og 14 puntos nga labaw sa ikatulong kuwarter nga miresuta sa 95-105 nilang kapildihan sa pasiunang duwa sa serye didto sa ilang korte sa miaging duha ka gaba.

Apan si Wembanyama mi-insister nga mahimo nilang balihon ang huyop sa hangin pabor kanila kon ugaling mabalik lang ang normal nilang duwa.

"Really I think the reason we lost that game isn't even technical," matud pa ni Wembanyama. "We need to approach the game with a better mental state."

Ang Game 2 sa best-of-seven series gikatakda sa alas 8:30 sa buntag karong adlawa (Sabado, Hunyo 6 oras dinhi sa Pilipinas) didto sa Frost Bank Center sa San Antonio, Texas.

"We just need to play our game. We just need to be normal. We don't need to do anything incredible," dugang pa ni Wembanyama.

Ang gipasabot nga normal ni Wembanyama mao ang naandan nilang duwa diin sila mihatag og atensiyon sa detalye ug hiniusa ang ilang paningkamot nga nakatabang sa Spurs pagkulit sa ikaduhang labing nindot nga rekord sa regular season ingon man pagpalayas sa defending champion Oklahoma City Thunder sa ilang trono sa Western Conference finals.

"'Normal' means trusting each other, trusting the basketball gods, trusting the game plan, executing, and not relying on talent so much to make shots or to save the day," dason pa ni Wembanyama.