CABC 8th Corporate Cup moarangkada na

CEBU, Philippines —  Ang ikawalong edisyon sa tinuig nga Corporate Cup sa Cebu Architects Basketball Club (CABC) mosikad na karong adlawa (Domingo, Mayo 31) didto sa Game Changer Sports Facility sa may dalan Hernan Cortes sa Barangay Banilad, siyudad sa Mandaue.

Sa dili pa ang mga duwa, usa ka simpleng seremonyas sa pagbukas ang ipahigayon sugod sa alas-1 sa hapon, sigun pa sa mga organizers nga gipangulohan nilang Oliver Tan ug Paolo Alberto atol sa usa ka press conference kagahapong adlawa sa Bai Hotel.

Miabot ngadto sa walo ka teams ang magbugno alang sa korona ning upat ka bulan nga torneyo. Kini mao ang SR & T Industrial Supply, Boysen, Modern Windows, Landlite, Davies, Corr Chem, EZ Pavers, ug PDS/Elite Athletics.

Moduwa sila og single round robin sa eliminasyon.

Ang Top 4 adunay twice-to-beat advantage batok sa makaatbang nilang ubos nga mga teams sa quarterfinals.

Ang mga mananaog moabante sa semifinals ug dayon sa kampiyonato nga parehong best-of-three series.