Spurs humirit ng Game 7 sa Thunder

SAN ANTONIO - Humakot si Victor Wembanyama ng 28 points, 10 rebounds at 3 blocks sa 118-91 pagbomba ng Spurs sa nagdedepensang Oklahoma City Thunder sa Game 6 para humirit ng ‘do-or-die’ Game 7 sa kanilang Western Conference finals series.

Nakatakda ang ‘winner-take-all’ game bukas sa Oklahoma City kung saan ang mananalo ang sasagupa sa New York Knicks sa NBA Finals.

Winalis ng Knicks ang Cleveland Cavaliers, 4-0, sa kanilang Eastern Conference finals duel.

Bumangon si Wembanyama at ang San Antonio mula sa naunang 114-127 kabiguan sa Game 5 para itabla sa 3-3 ang kanilang best-of-seven showdown ng defending champion.

“Playing with desperation just feels like it erases kind of all the little mistakes that we do that are human nature, whether it’s in the regular season or previous games,” sabi ng 7-foot-4 na si Wembanyama. “Just got to fight that all the time and put your backs against the wall. It feels like it’s the best opportunity to be able to play.”

Nagdagdag si Fil-Am Dylan Harper ng 18 points para sa Spurs  habang may 17 at 12 markers sina Stephon Castle at Devin Vassell, ayon sa pagkakasunod.

Nalimitahan si Thunder star Shai Gilgeous-Alexander sa isang team-high 15 points mula sa masamang 6-for-18 field goal shooting, habang kumolekta si Chet Holmgren ng 10 points at 11 rebounds.

“I just think all of our focus and attention was on the defensive end,” ani Castle sa kanilang depensa.

Hindi pinaiskor ng San Antonio ang Oklahoma City sa loob ng walong minuto sa third period tampok ang kanilang 22-0 atake para ilista ang 92-64 abante sa huling 56 segundo ng nasabing yugto.

Mula rito ay hindi na nakabangon ang Thunder sa fourth quarter.