Karong adlawa sa nustar

Russian GM Ivan Popov moduwa og simul chess exhibition

CEBU, Philippines — Ang nabantog nga Russian Grandmaster nga si Ivan Popov moduwa og simultaneous exhibition uban sa mga Sugbuanong chess players sugod sa alas 1:30 sa hapon karong adlawa (Huybes, Mayo 28) sa Nustar Hotel and Casino.

Si Popov, nga adunay FIDE rating nga 2610, usa ka bangiitang Russian GM nga labing nailhan sa pagdaog niya sa 2007 Under 18 World Youth Championship ug sa 2015 European Rapid Chess Championship.

Ang 36-anyos nga si Popov mokumbati batok sa Top 10 gikan sa Open division ug Top 5 gikan sa Under 13 category sa The Grandmaster Challenge:Philippine-Russian Open Chess Tournament nga gipahigayon niadtong Mayo 23-24 sa Cube Wing Atrium sa SM Seaside City.

Kini mao sila si National Master Merben Roque, Jacqpatch Immanuel Abalo, NM Diego Abraham, NM Elwin Retanal, Arena International Master Rogel Nino Panilagao, Chris Aldritz Pondoyo, Arena Grandmaster Johnny Wellen Carzano, Bhell Ortiz, Ariel Joseph Abellana, Kyle Zephyrr Abalo, Josue Contaoi Jr., Maica Cadenas, Aldrin Wayne Cabusas, ug Yoana Kaizzy Pacina.

Gipasiugdahan sa Philippine-Russian Business Assembly, Inc. (PRBA) inabagan sa Cebu Independent Chess Association, ang 15-board simul chess kabahin sa selebrasyon sa ika-50 nga anibersaryo sa maanindot nga relasyon tali sa Pilipinas ug Russia.