Thunder inilapit ni SGA sa NBA Finals

OKLAHOMA CITY — Bumira si Shai Gilgeous-Alexander ng 32 points habang may 22 markers si Alex Caruso sa 127-114 paggupo ng nagdedepensang Thunder sa San Antonio Spurs para sa 3-2 lead sa kanilang Western Conference finals series.

Nagdagdag si Jared McCain ng 20 points sa kanyang unang playoff start para sa Oklahoma City na nakahugot kay Chet Holmgren ng 16 points at 11 rebounds.

“We definitely got better from the last game,” sabi ni Gilgeous-Alexander sa nauna nilang 82-103 kabiguan sa Game 4.

Kumolekta si center Isaiah Hartenstein ng 12 points at 15 boards para sa defending champion.

“We obviously played a lot better, in terms of our process and then also the outcome,” ani coach Mark Daigneault. “It’s a playoff series. If you look at any playoff series that goes to six games, at least, there’s going to be some tough games.”

Isang panalo na lang ang kailangan ng Thunder para maitakda ang kanilang NBA Finals showdown ng New York Knicks na winalis ang Cleveland Cavaliers, 4-0, sa kanilang Eastern Conference finals series.

Magsisimula ang NBA Finals sa Hunyo 4.

Umiskor si Stephon Castle ng 24 points para sa Spurs habang may 22 at 20 points sina Julian Champagnie at 7-foot-4 Victor Wembanyama, ayon sa pagkakasunod.

Nag-ambag si Keldon Johnson ng 15 mula sa bench para sa Spurs na naimintis ang 29 sa kanilang 41 tira sa three-point line.

Nakatakda ang Game 6 bukas sa San Antonio.

Humataw ang Thunder ng 40 points sa second quarter para ibaon ang Spurs sa 101-91 papasok sa fourth period.