Batch 2003, 2013 4-0 na sa SHAABAA; Ghassemi, Cabahug mikawat og atensyon

CEBU, Philippines — Ang Cebu Landmasters Batch 2003 ug Nest Workspaces Batch 2013 mikadlit sa ikaupat nilang sagunson nga daog apan sila si Afshin Ghassemi sa Core Pacific ug Elddie Cabahug of Insular Square Batch 2005 namamaneho pagkawat og atensyon sa Sacred Heart Ateneo Alumni Basketball Athletic Association (SHAABAA) Season 29 niadtong Domingo, Mayo 24, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, siyudad sa Mandaue.

Si Raymond Dennis Tan mipupo og 25 puntos, upat ka rebounds, tulo ka assists ug tulo ka steals samtang si Justin Huang midugang og 23 puntos, unom ka rebounds, usa ka assist ug tulo ka steals sa dihang gipayaka sa Batch 2003 ang ARQ Batch 2001, 68-50, aron pagpabilin sa kinatas-ang dapit sa Division A uban ang limpyong 4-0 nga marka.  Sa Division B, si Fletcher Galvez mikolekta og 24 puntos, 13 ka rebounds, tulo ka assists ug duha ka steals samtang si Jasper Diaz miamot og 17 puntos ug 11 ka rebounds sa dihang ang Batch 2013 miinat sa perpekto nilang sinugdanan ngadto sa 4-0 uban ang 69-60 nga pagpakaging sa Hatch IT Solutions Batch 2010.

Sila si Ghassemi ug Cabahug mihimo sab og impresyon.

Si Ghassemi mirehistro og talagsagong triple-double nga 29 puntos, 17 ka rebounds ug 12 ka assists uban ang duha ka steals aron ibandera ang Core Pacific ngadto sa 132-77 nga demolisyon sa 2K Cares. Si Joseph Lo mibirada og double-double nga 20 puntos ug 11 ka rebounds uban ang tulo ka assists ug upat ka steals satang si Jeremy Huang mitampo og 19 puntos, walo ka rebounds, usa ka assist ug tulo ka steals aron tabangan ang Core Pacific pagbitad sa ilang rekord ngadto sa 3-1 tabla sa Big Three Pizza Batch 1996, nga miangkon sa ikatulo nilang daog human gilampaso ang Magis Medical Services, 85-59.

Sila si Roderick Mangubat, Serg Al Go Bui ug Tonyson Lee mikulit og double-double alang sa Batch 1996. Si Mangubat miharos og 30 puntos, 12 ka rebounds lima ka assists ug usa ka steal, si Go Bui mibulsa og 21 puntos, 17 ka rebounds ug upat ka assists samtang si Lee mitali og 14 puntos, 12 ka rebounds ug tulo ka assists. Sa iyang bahin, si Cabahug mipatuasik og makapakurat nga 55 puntos uban ang lima ka rebounds, unom ka assists ug tulo ka three steals sa dihang gibugha sa Batch 2005 ang Batch 2006, 86-72, alang sa una nilang daog.

Sa ubang mga duwa sa Division B, sila si Aaron Baldwin Sing ug Dave Wilson Yu nagkumbinar og 51 puntos, 21 ka rebounds ug 10 assists ka asssists sa dihang ang defending champion Harley Davidson Batch 2012 milampornas saBatch 2008, 99-78, aron pag-angkon og bahin sa ikaduhang puwesto uban sa Batch 2004 bitbit ang managsamang 3-1 nga baraha.

Sa Division C, si Franz Ray Diaz mihipos og 17 puntos, unom ka rebounds, tulo ka assists ug duha ka steals samtang sila si Benedict Andre Chua, Patrick Wilson Yu ug Eroll Pastor misumite og double-double sa dihang gipahugtan sa Core+ Batch 2018 ang pagkupot nila sa liderato uban ang 5-1 rekord human gibugha ang BRX Batch 2015, 74-62. Si Chua mitimbre og 14 puntos ug 11 ka rebounds, si Yu  adunay 13 puntos ug 10 ka rebounds samtang si Pastor mitampo og 12 puntos ug 14 ka rebounds. Sa ubang mga resulta, ang CHEK Technologies Batch 2025 mikastigo sa Comforser Tires Batch 2022, 112-82, ang Batch 2014 mikulata sa 730 Autoworx Batch 2024, 88-65, samtang ang FADI Batch 2021 mitumba sa Rufrance LPG Batch 2026, 78-70.

Si Erik Jabalon maoy nangu sa Batch 2025 uban ang 28 puntos, 15 ka rebounds ug siyam ka assists, si Ellieken Lim miwadwad og 27 puntos, walo ka rebounds ug upat ka assists samtang si Renzo Zanoria miposte og triple-double nga 25 puntos, 21 ka rebounds ug 13 ka assists.  Si Lucky Ecarma mibubo og 23 puntos, 17 ka rebounds ug unom ka assists alang sa Batch 2014 samtang si Rey Marcus Fuentes IV ang bida sa Batch 2021 uban ang 28 puntos, 11 ka rebounds ug upat ka assists.