Cebu Greats padayong nagmangtas sa MPBL

CEBU, Philippines — Ang Cebu Greats mikulata sa Manila Batang Quiapo, 128-83, alang sa ikalima nilang sunod-sunod nga daog sa Maharlika Pilipinas Basketball League (MPBL) Season 8 niadtong Lunes sa gabii, Mayo 25, didto sa Novadeci Convention Center sa dakbayan sa Quezon.

Sila si Mark Meneses, Dhon Reverente ug Kint Ariar miposte og double-double sa dihang giinat sa miratsadang Greats ang ilang rekord ngadto sa 7-2.

Si Meneses mitali og 20 puntos ug 11 ka rebounds uban ang duha ka assists, si Reverente mipupo og 14 puntos ug 17 ka rebounds uban ang upat ka assists samtang si Ariar mitimbre og 12 puntos, 11 ka rebounds, upat ka assists ug usa ka steal.

Lain pang tulo ka players sa Cebu ang mirehistro og double figures, apil si Ron Dennison nga mihipos og 14 puntos ug usa ka assist. Si Isaiah Hontiveros mikimada og 10 puntos, tulo ka rebounds ug lima ka assists samtang si Jonathan Ralf Gesalem mi-iskor sab og 10 puntos uban ang tulo ka assists alang sa Cebu, nga wala na mahulga pa sukad misirit ngadto sa mainit nga sinugdanan, 36-23.

Ang Greats mihuman sa first half uban ang 71-49 nga bentaha sa wala pa kini nila giinat ngadto sa 105-74 human sa tulo ka kuwarter.

Bisan pa sa dako nilang labaw, ang Greats padayong nagmangtas nga miresulta ngadto sa impresibo nilang 35 puntos nga demolisyon sa Batang Quiapo.