ROY igagawad kay Bella

MANILA, Philippines — Isa si Bella Belen sa pangunahing inaasahan ng Capital1 Solar Spikers sa opensa sa nakalipas na season ng Premier Volleyball League (PVL).

Bago sumabak sa PVL, naglaro muna si Belen sa Alas Pilipinas sa ilang international tournaments.

Matapos nito, agad na sumalang si Belen sa kalagitnaan ng Reinforced Conference at sa season-ending All-Filipino Conference.

Sa dalawang kumperensiya, nagparamdam agad ng lakas si Belen para tulungan ang Solar Spikers.

Dahil dito, igagawad kay Belen ang Rookie of the Year award sa 2nd PVL Press Corps Awards Night na gaganapin sa May 30 sa Novotel Manila Araneta City sa Cubao, Quezon City.

Nakakuha ang dating National University standout ng 69 media votes at 26 team votes habang may 91.284 statistical points (SPs) ito para sa kabuuang 186.284 points.

Naungusan ni Belen sina AC Miner (85 points), Jean Asis (83.896) at Riza Nogales (64.479).

Sa All-Filipino Conference, nagtapos si Belen sa ikatlong puwesto sa scoring matapos ang preliminary round kung saan nakalikom ito ng kabuuang 218 points.

May spiking success ito na 35.16 percent habang ikalawa ito sa reception tangan ang 40.84 percent efficiency.

Kasama rin si Belen sa Mythical Team kung saan tatanggapin nito ang Best Outside Spiker award hawak ang 91.284 SPs kasama ang 45 media votes at 33.4 team votes.

Kasama ni Belen si Savi Davison ng PLDT bilang Best Outside Spiker na may 89.252 SPs, 44.4 media votes at 19.4 team votes.