Spurs binawian ng Thunder

OKLAHOMA CITY — Bumira si Shai Gilgeous-Alexander ng 30 points para tulungan ang nagdedepensang Thunder sa 122-113 pagresbak sa San Antonio Spurs sa Game 2 at itabla sa 1-1 ang kanilang Western Conference finals series.

Nag-ambag si Alex Caruso ng 17 points mula sa bench para sa pagresbak ng Oklahoma City sa San Antonio habang may 13 at tig-12 markers sina Chet Holmgren at reserves Jared McCain at Cason Wallace, ayon sa pagkakasunod.

“I thought we all played better,” sabi ni Thunder coach Mark Daigneault. “I had a quiet confidence about that. I didn’t know if we’d win or lose the game, but I was pretty sure after watching Game 1 and knowing our team that we were going to come out and play better tonight.”

Nagdagdag si Isaiah Hartenstein ng 10 points at 13 rebounds para sa defending champion.

Umiskor si Stephon Castle ng 25 points sa panig ng Spurs na nakahugot ng 22 points kay Devin Vassell habang humakot si Victor Wembanyama ng 21 points, 17 rebounds, 6 assists at 4 blocks.

Hindi natapos ni Fil-Am guard Dylan Harper ang laro para sa Spurs matapos magkaroon ng right leg injury sa third quarter.

Kinuha ng Oklahoma City ang isang 11-point lead sa halftime bago ito naputol sa 97-99 sa 9:06 minuto ng fourth period.

Isang 11-0 atake ang ginawa ng Thunder kasama ang isang banked-in three-pointer ni McCain para ilista ang 13-point advantage.

Sa likod ni Wembanyama ay muling nakalapit ang Spurs sa 113-118 sa huling 1:25 minuto ng laro.

Umiskor naman si Gilgeous-Alexander para selyuhan ang panalo ng Oklahoma City.