Batch 2003, 2004 wa gihapoy pildi sa SHAABAA

CEBU, Philippines — Ang Cebu Landmasters Batch 2003 ug '04 The Win Batch 2004 miinat sa way pildi nilang ratsada ngadto sa tulo ka duwa sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue. Si Justin Huang mibulsa og 17 puntos, siyam ka rebounds ug duha ka assists samtang si Mikhail Ivan Kristoff Jo mikatag og 16 puntos, siyam ka rebounds, tulo ka assists ug tulo ka steals sa dihang gilampaso sa Batch 2003 ang Batch 2002, 94-48, aron pahugtan ang ilang pagkupot sa liderato sa Division A uban ang perpektong 3-0 rekord.

Sila si Carlo Cecil Alerta ug Rich Tuadles midugang og 12 puntos matag usa gawas nga nagkumboya sab sila og 15 ka rebounds, 10 ka assists ug upat ka steals samtang si Raymond Dennis Tan miamot og 10 puntos, unom ka rebounds ug usa ka assist sa balanseng opensiba sa Batch 2003.

Sa laing mga duwa sa Division A, ang Core Pacific milampornas sa Magis Medical Services, 100-86, samtang ang Big Three Pizza Batch 1996 mikastigo sa 2K Cares, 80-54.

Si Ray Maquilan mitapos uban ang 17 puntos ug upat ka rebounds samtang sila si Joel Co ug Afshin Ghassemi parehong miposte og double-double aron tabangan ang Core Pacific pagkulit sa ikaduha nilang daog sa tulo ka duwa. Si Co mikolekta og 16 puntos, 11 ka rebounds, unom ka assists ug duha ka steals samtang si Ghassemi mitimbre og 14 puntos ug 10 ka rebounds.

Ang Batch 1996 nagkupot na sab karon og 2-1 nga baraha luyo sa paningkamot nilang Serg Go Bui ug Roderick Mangubat nga nagkumbinar og 27 puntos, siyam ka rebounds ug unom ka assists.

Sa Division B, si Ervin Lopena mirehistro og makapakurat nga double-double nga 35 puntos ug 19 ka rebounds uban ang lima ka assists, upat ka steals ug usa ka block sa dihang ang Batch 2004 nakaipsot sa Insular Square Batch 2005, 89-85, alang sa ikatulo nilang sagunson nga daog.

Si Lopena gisuportaan ni Kyle Valmoria uban ang 23 puntos, siyam ka rebouds ug siyam ka assists ingon man ni Christoher Consunji bitbit ang 12 puntos, 11 ka rebounds ug tulo ka assists.

Ang defending champion Harley Davidson Batch 2012, nga gigatongan og 24 puntos, 10 ka rebounds ug unom ka assists gikan n Dave Wilson Yu, nagkupot na karon og 2-1 rekord human gibugha ang Hatch IT Solutions Batch 2010, 84-71, samtang sila si Chris Tomakin ug Niel Benedicto mikuha og atensiyon sa dihang ang Batch 2006 mipiog sa Batch 2008, 62-56, alang sa una nilang daog. Si Tomakin mipupo og 18 puntos, lima ka rebounds ug pito ka steals samtang si Benedicto mikimada og 16 puntos, 19 ka rebounds ug upat ka assists.

Sa Division C, ang defending champion Core+ Batch 2018 ug Rufrance LPG Batch 2026 mipayaka sa ilang mga kontra aron bitaron ang ilang baraha ngadto sa 3-1. Si Patrick Wilson Yu mitali og 19 puntos, walo ka rebounds ug duha ka assists aron ibandera ang Batch 2018 ngadto sa 87-63 nga paglampornas sa Batch 2014.

Si Shawn Harvey Ayuda mipabuto og 27 puntos uban ang walo ka rebounds, lima ka assists ug duha ka steals, si Vann Derick Colonia mi-iskor og 20 samtang si Benj Anthony Chua miharos og 18 puntos, 13 ka rebounds, walo ka assists, lima ka steals ug duha ka blocks sa dihang gipahagba sa Batch 2026 ang Comforser Tires Batch 2022, 87-73.

Sa ubang mga resulta, si Rey Marcus Fuentes IV mipaulbo og 33 puntos uban ang 16 ka rebounds ug upat ka steals sa dihang gilat-an sa FADI Batch 2021 ang 730 Autoworx Batch 2024, 95-65, aron pakgangon ang duha ka sagunson nilang pildi samtang si Renzo Zanoria mibirada og 23 puntos, pito ka rebounds, 10 ka assists ug tulo ka steals sa dihang gipakaging sa CHEK Technologies Batch 2025 ang BRX Batch 2015, 81-77, aron isaka ang ilang marka ngadto sa 2-1 tabla sa ilang biktima.