Spurs abante sa West Finals, Pistons buhi pa

CEBU, Philippines —  Si Stephon Castle mipaulbo og 32 puntos uban ang 11 ka rebounds sa dihang gipatikangkang sa San Antonio Spurs sa hingpit ang Minnesota Timberwolves uban ang 139-109 nga demolisyon sa Game 6 aron pag-abante sa NBA Western Conference Finals kagahapong adlawa didto sa Target Center sa Minneapolis, Minnesota.

Hait kaayo si Castle nga miposa sa nag-una niyang lima ka 3-pointers ug sa kinatibuk-an mipasud og 11 sa 16 niya ka itsa.

Midugang si De’Aaron Fox og 21 puntos ug siyam ka assists, sila si Julian Champagnie ug Victor Wembanyama nagkumboya'g 35 puntos samtang ang rookie nga si Dylan Harper miamot og 15 puntos alang sa Spurs, nga mitapos sa serye sa baraha nga 4-2 aron pagtikang sa West Finals diin ilang makasangka ang defending champion Oklahoma City Thunder.

Si Anthony Edwards mipupo og 24 puntos, si Terrence Shannon mi-iskor og 21 samtang si Naz Reid mitali og 18 puntos apan silang tanan naminghoy kay nanamilit na ang Wolves.

Sa Eastern Conference, si Cade Cunningham mikadlit og 21 puntos sa dihang ang Detroit Pistons nakalihay sa eliminasyon uban ang 115-94 nga paglampaso sa Cleveland Cavaliers.

Si Cunningham, nga miposa og lima ka 3-pointers, usa lamang sa unom ka Detroit players nga miposte og double figures.

Si Paul Reed mihipos og 17 puntos samtang sila si Jalen Duren ug Daniss Jenkins miamot og 15 puntos matag usa. Dominante sab si Duren sa depensa uban ang 11 ka rebounds, tulo ka blocks ug usa ka steal alang sa Pistons, nga maoy mo-host sa tinagakay nga Game 7 karong Lunes diin ang modaog makigharong sa New York Knicks sa East Finals.

Ang beteranong si James Harden maoy nangu sa Cavs uban ang 23 puntos samtang si Donovan Mitchell nalimitahan ngadto sa 18 puntos sa pildirong kawsa.