Bolick nangu sa sikit nga karera pagka-BPC
CEBU, Philippines — Si Robert Bolick sa NLEX Road Warriors maoy nangu sa sikit nga karera alang sa Best Player of the Conference award ning PBA Season 50 Commissioner’s Cup.
Luyo sa impresibong salida ni Bolick, ang NLEX milugwa nga No.1 seed sa quarterfinals bitbit ang 10-2 rekord human sa eliminasyon.
Tungod niini, ang 30-anyos nga si Bolick nakaangkon og 41.9 statistical points gikan sa iyang average nga 20.5 puntos, 5.7 rebounds, 8.8 assists ug 1.8 steals matag duwa.
Nagsunod kaniya ang bitoon sa San Miguel Beer nga si June Mar Fajardo, nga nakakuha og 39.5 SPs gikan sa average niining 16.8 puntos, 14.8 rebounds, 2.5 assists, ug 1.0 steals.
Nagbarog sa ikatulong dapit si Ginebra guard RJ Abarrientos uban ang 37.5 SPs samtang nag-okupar sa ikaupat ug ikalimang puwesto sila si Ricci Rivero (34.9 SPs) sa Phoenix ug Zav Lucero (33.5 SPs) sa Magnolia.
Nalangkob sa Top 10 sila sila si Jerrick Ahanmisi (32.8 SPs) sa Terrafirma, Scottie Thompson (32.2 SPs) sa Ginebra, CJ Perez (31.6 SPs) sa San Miguel, Deschon Winston (31.1 SPs) sa NLEX ug CJ Cansino (29.9s SPs) sa Meralco.
- Latest
