Cebu Greats padayong nanginit sa MPBL
CEBU, Philippines — Ang Cebu Greats nakasustinir sa ilang pagsaka uban ang 109-94 nga paglampornas sa Sarangani 10ACT Marlins sa Maharlika Pilipinas Basketball League (MPBL) Season 8 niadtong Miyerkules sa gabii, Mayo 13, didto sa Caloocan Sports Complex.
Si Mark Meneses miharos og 25 puntos, 11 ka rebounds, tulo ka steals ug tulo ka blocks aron ituboy ang Cebu sa ikatulo nilang sagunson nga daog. Dako sab og naambag si Wowie Escosio bitbit ang 14 puntos ug siyam ka rebounds ingon man si Kint Ariar uban ang 13 puntos, tulo ka rebounds ug duha ka assists.
Sila si Simon Camacho, Dhon Reverente ug Paul Desiderio nagkumboya'g 27 puntos ug 17 ka rebounds alang sa Greats, nga nagkupot na karon og 5-2 nga baraha.
Ang Sarangani, nga nakatilaw sa ikalima nilang sagunson nga pildi human midaog sa una nilang duwa, gipangulohan ni Danny Marilao uban ang 22 puntos ug unom ka rebounds.
Si Leland Estacio mipupo og 17 puntos, tulo ka assists ug duha ka rebounds, si Yvan Ludovice adunay 15 puntos, upat ka assists ug duha ka rebounds samtang sila si Larce Sunga ug Migs Pascual nagkumbinar og 22 puntos sa pildirong kawsa.
- Latest
