Zhu milupig ni Abne

CEBU, Philippines — Sa usa ka makutas ug malisud nga binukbokay, si DianXing Zhu sa China milugwa nga madaogon batok sa lig-on kaayong si Ian Paul "Assassin" Abne sa ARQ Stable sa ilang International Boxing Federation (IBF) minimumweight title eliminator nga maoy main event sa "Fist of Fury X" nga pasundayag sa Chao Sy International Promotions niadtong Sabado sa gabii, Mayo 9, sa Cebu Coliseum.

Ang 29-anyos nga si Zhu mitumba ni Abne duha ka higayon sa ikaunom ug ikawalo nga hugna nga nakahatag kaniya og dakong bentaha aron paglansang og daog pinaagi sa unanimous decision human sa puno sa aksiyon nilang engkwentro nga gikalingaw og maayo sa mga nanan-aw.

Ang tulo ka judges mi-iskor sa way og 115-111, 114-112 ug 116-110 alang ni Zhu, nga miinat sa iyang rekord ngadto sa 17-1 uban ang 14KOs.

Labaw sa tanan, ang gikaintapang Chinese knockout artist nakaangkon og katungod nga mohagit ni IBF 105-pound champion Pedro Taduran (20-4-1, 14KOs), nga mitan-aw sa eksplosibong 12 ka hugna nga kumbati sa ringside. Human dayon sa away, si Taduran mipadayag sa iyang kaandam nga manalipod sa iyang trono batok ni Zhu. "Gusto ko sa Pilipinas ang laban, lalo na dito sa Cebu," matud pa ni Taduran, nga naglantaw sa unahan nga makaharong si Zhu alang sa iyang titulo sa duol nga umaabot. Sa iyang bahin, si Abne naparot sa unang higayon sa 15 ka away apan angay gihapon siyang mapasigarbuon sa gipakita niyang kaisog ug determinasyon taliwala sa way hunong nga ataki ni Zhu sa tibuok nga bahin sa kulbahinam nilang sangka.

Sa laing bahin, ang Chao Sy Stable nakahulma og duha ka kampiyon sa usa ka gabii human sila si Jemuel Arañas ug Johnpaul "Angas ng Cebu" Gabunilas mipatikangkang sa tagsa-tagsa nila ka mga kaatbang.

Si Arañas (9-3-1, 5KOs) mipaundang ni Jeric Noynay sa ikatulong hugna aron sakmiton ang World Boxing Foundation (WBF) Silver flyweight belt samtang si Gabunilas (11-4, 8KOs) mihimo og impresyon sa iyang pagbalik gikan sa duha ka tuig nga pahuway uban ang upat ka hugna niyang demolisyon ni Ramil Roda Jr. aron langkaton ang korona sa Philippine Boxing Federation (PBF) super flyweight division. Si Justin Trazo maoy nagpasiugda sa 3-0 sweep sa mga boksidor ni Chao Sy human niya gipakamang si Conrad Jason Agujar sud lamang sa usa ka hugna. Sa ubang mga resulta, sila si Mark Sabang, Marlon Alejandro ug Venance Dances parehong midaog pinaagi sa split decision batok nilang Jubert Cahimat, Carl Penedo ug Norman Rusiana samtang si Jony Mar Loreño mipukan ni Kei Mark Akut pinaagi sa unanimous decision.