Cong. Patsy mapasalamaton sa suporta sa mga mayor

CEBU, Philippines —  Gikan sa semonyas sa pagbukas ngadto sa finals sa labing unang Calderon Cup 21 Under Inter-Town Basketball Tournament, ang presensiya sa tanang mayor gikan sa walo ka munisipilidad nga naglangkob sa Septimo Distrito sa Sugbo usa ka maanindot nga talan-awon alang ni kongresista Patricia "Patsy" Calderon.

Walay kasudlan si Calderon sa iyang kalipay sa dihang nakita ang mga opisyales gikan sa iyang distrito nga tibuok puwersa nga mitan-aw sa Game 1 sa best-of-three championship series tali sa Malabuyoc ug Dumanjug niadtong Biyernes sa gabii, Mayo 8, didto sa Malabuyoc Sports Complex sa habagatang bahin sa Sugbo.

Si Calderon nagkanayon nga ang hugtanong suporta nilang mayor Gungun Gica (Dumanjug), Titing Cabaron (Moalboal), Fritz Lastimoso (Alcantara), Gilberto Magallon (Alegria), Edang Piedad (Malabuyoc), Jerome Christian Librando (Badian), Roy Vincent Singco (Ginatilan) ug Chantilli Blanco (Ronda) usa ka solidong kamatuoran nga ang mahinungdanon nilang kawsa nahimong usa ka simbolo sa paghiusa ug panagdait tali sa mga lungsod sa ikapitong distrito.

Tungod niini, si Calderon mapasalamaton kaayo.

"The energy, passion, and support shown by our people prove that sports can truly bring communities together," matud pa ni Calderon sa usa ka pamahayag. "I am deeply grateful to all our mayors, local officials, coaches, organizers, supporters, and most especially our athletes for making this endeavor meaningful and inspiring."

"Daghang salamat sa inyong suporta ug pakighiusa. Padayon ta sa pagpalambo sa sports ug kabatan-onan sa atong distrito," dugang pa ni Calderon.