Knicks nanoktok sa East Finals, Spurs 2-1 na

CEBU, Philippines —  Si Jalen Brunson misidlak na sab sa dihang gipayaka sa New York Knicks ang Philadelphia 76ers, 108-94, aron pagposte og 3-0 nga bentaha sa ilang best-of-seven NBA Eastern Conference semifinals kagahapong adlawa didto sa

Wells Fargo Center sa Philadelphia, Pennsylvania.

Mao kadto ang ikaunom nga sagunson nga daog sa Knicks, nga wala na mapildi sukad sila mi-rally gikan sa 2-1 nga pagkaalkansi sa unang hugna sa playoffs batok sa Atlanta Hawks.

Salamat ni Brunson nga mibubo og 33 puntos ug siyam ka assists alang sa Knicks, nga nanginahanglan og usa na lang ka daog aron moabante sa East Finals.

Si Brunson gisuportaan sa solidong depensa nilang Karl-Anthony Towns ug Josh Hart, nga nagkumboya'g 23 ka rebounds alang sa Knicks.

Ang Sixers nanghinaut sa usa ka dakong milagro gumikan kay wala pa may team nga nakadaog human malubong og 3-0 sa usa ka serye sa kasaysayan sa NBA.

Sa Western Conference, si Victor Wembanyama dominante kaayon aron pangulohan ang San Antonio Spurs ngadto sa 115-108 nga paglatigo sa Minnesota Timberwolves nga nakahatag kanila og 2-1 nga labaw sa ilang serye.

Si Wembanyama mibubo og 16 sa iyang 39 puntos sa katapusang kuwarter nga iyang gidayan-dayanan og 15 ka rebounds ug lima ka blocks.

Si Anthony Edwards nagparamdam dayon sa iyang pagbalik sa Wolves uban ang 32 puntos, 14 ka rebounds ug unom ka assists apan wala mosaler ang impresibo niyang salida.