SHAABAA Season 29: Defending champions Batch 2018, 2012 miagi og managlahing dalan

CEBU, Philippines — Ang defending champions Core+ Batch 2018 (kanhi Xchange Forex) ug Harley Davidson Batch 2012 nakasinati og sukwahi nga kapalaran pagsugod sa Sacred Heart Ateneo Alumni Basketball Athletic Association (SHAABAA) Season 29 niadtong Domingo, Mayo 3, didto sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, siyudad sa Mandaue. Ang Batch 2018 misikad sa ilang kampanya pagpanalipod sa ilang trono sa Division C uban ang 75-68 nga pagpakaging sa CHEK Technologies Batch 2025.

Si Patrick Wilson Yu mirehistro og double-double nga 21 puntos ug 13 ka rebounds nga iyang gipalamanan og tulo ka assists alang sa Batch 2018.

Mikuha sab og atensiyon si Franz Ray Diaz bitbit ang 17 puntos, tulo ka rebounds, duha ka assists ug usa ka a stealm samtang si Juan Miguel de la Torre miamot og 12 puntos, upat ka rebounds ug duha ka steals alang sa Batch 2018.

Sa laing mga duwa sa Division C, ang Batch 2014 mipukan sa FADI Batch 2021, 59-54, ang  730 Autoworx Batch 2024 mibugha sa Rufrance LPG Batch 2026, 83-65, samtang ang BRX Batch 2015 mipayaka sa Comforser Tires Batch 2022, 88-60.

Sila si Arvid Jason Ong, Lucky Ecarma, Jair Igna ug Noriko Benedicto nagkumbinar og 46 puntos ug 14 ka rebounds aron ituboy ang Batch 2014 sa madasigon nga sinugdanan.

Si Shawn Ayuda maoy nangu sa Batch 2004 uban ang 28 puntos ug walo ka rebounds samtang si Felixberto Jaboneta ang bida sa Batch 2015 uban ang makapakurat niyang double-double nga 35 puntos ug 22 ka rebounds.

Sa  Division B, ang kasamtangang kampiyon nga Batch 2012 nakatilaw og 60-86 nga pagkastigo sa mga kamot sa '04 The Win Batch 2004.

Si Franco Te ang nagpasiugda sa balanseng opensiba sa Batch 2004 uban ang 22 puntos, pito ka rebounds, duha ka assists ug tulo ka steals.

Si Ervin Lopena midugang og 19 puntos, 11 ka rebounds, duha ka assists ug usa ka steal samtang si Kylle Valmoria miposte og talagsaong triple-double uban ang 14 puntos, 16 ka rebounds ug 12 assists alang sa Batch 2004.

Sa ubang resulta sa Division B, si Rendell Senining mipabuto og 32 puntos uban ang unom ka rebounds ug lima ka assists aron ibandera ang Nest Workspaces Batch 2013 ngadto sa 87-83 nga kadaogan batok sa Batch 2008, samtang si Jasper Diaz mikadlit og double-double nga 23 puntos ug 13 ka rebounds aron ituboy ang Hatch IT Solutions Batch 2010 ngadto sa 83-47 nga demolisyon sa Insular Square Batch 2005.