Cavs tinapos Raptors, babangga sa Pistons sa semis

CLEVELAND— Dinuplika ni Jarrett Allen ang kanyang playoff career high na 22 points at kumalawit ng 19 rebounds sa 114-102 pagsibak ng Cavaliers sa Toronto Raptors sa Game 7 papasok sa Eastern Conference semifinal round.

Umiskor si Donovan Mitchell ng 22 points at may 18 markers si James Harden para sa No. 4 seed Cleveland na sasagupain ang top-seeded Detroit Pistons sa Game 1 ng second round.

Kapwa may 2-2 record ang Central Division rivals sa kanilang regular-season meetings.

Bumanat si Scottie Barnes ng 24 points at may 23 markers si RJ Barrett para sa Raptors na nakapasok sa playoffs sa unang pagkakataon simula noong 2022.

Hindi naglaro si All-Star forward Brandon Ingram sa ikalawang sunod na pagkakataon dahil sa kanyang bruised right heel.

Isang 49-21 atake ang ginawa ng Cleveland sa second at third quarter para iposte ang 19-point advantage mula sa isang nine-point deficit sa Toronto.

Ang fast-break dunk ni Allen ang nagbigay sa Cavaliers ng 74-59 bentahe sa third period.

Sa Detroit, pinatalsik ng Pistons ang Orlando Magic, 116-94, sa Game 7 para sumampa sa Eastern Conference semifinals.

Tumipa si Cade Cunningham ng 32 points at 12 assists para sa Detroit.