Korean Rider sa stage 6

Kyeong Ho Min bumida sa pagudpud

PAGUDPUD, Ilocos Norte , Philippines  -- Kumawala si Kyeong Ho Min ng Seoul Cycling Team mula sa isang five-man lead pack para mag-isang tawirin ang finish line at ang­kinin ang 223.7-kilometer Stage Six ng MPTC Tour of Luzon 2026 kahapon dito sa Pagudpud Municipal Hall.

Ang 29-anyos na si Min ay nagposte ng bilis na limang oras, 12 minuto at 13 segundo para sa kanyang unang individual stage win matapos gabayan ang Seoul Cycling Team sa panalo sa Stage Two Team Time Trial.

“It was not my plan because I was aiming for tomorrow’s (Individual) Time Trial, but then I saw that the others were struggling on the climb, so I got the chance and I took it,” sabi ng 2017 Tour of Korea champion.

Humataw si Min sa huling 10 kilometro para iwanan ang grupo nina Mervin Corpuz (7-Eleven Cliqq Roadbike Philippines) Rench Bondoc (Go for Gold Philippines), Jexxel Azur (Standard Insu­rance Philippines) at Noor Roseidi (Malaysia National team) para sa kanyang solo win.

Pinakain ni Min ng alikabok sina back-to-back stage winner Ivan Anisimov ng LCW UAE Cycle (05:14:29) at Ronald Oranza ng Standard Insurance Philippines (05:14:29) na tumapos sa ikalawa at ikatlo, ayon sa pagkakasunod.

“Sobrang hirap, talagang tiyagaan lang. Sobrang init pa, buti na lang sa harap ko nagkamenoran, kaya nakadikit pa ako,” sabi ni Oranza sa 1,821.1-kilometer, 14-stage race na iniha­handog ng Philippine Sports Commission katuwang ang Philippine Olympic Committee at PhilCycling.

Samantala, suot pa rin ni Nikita Shulchenko ng LCW UAE Cycle ang yellow jersey sa kanyang nakolektang 19:01:14 sa Individual General Classification.

“I hope to keep this yellow jersey until the last stage,” pahayag ng Russian cyclist na hindi pa nanalo ng anumang stage.

Patuloy ding bumabandera ang Go for Gold sa nahakot na 77:13:38 kasunod ang Standard Insurance at 7-Eleven Cliqq Roadbike Philippines na may 1:01 minutong agwat at Standard Insurance na may 2:48 minuto ang layo.

Bibitawan nga­yong umaga ang Stage Seven 22.9km Individual Time Trial na magsisimula at magtatapos sa Pagudpud Town Hall.

May nakahanda nang plano si Min para sa nasabing yugto.

“I plan to race faster since this is individual time trial, and hopefully get another stage win,” sabi ni Min.