Inoue mipildi ni Nakatani

CEBU, Philippines — Ang Hapon nga si Naoya Inoue nagkanayon nga nakaginhawa siya'g lawom human gibuntog ang kababayan niyang si Junto Nakatani aron pagpabiling way pildi atubangan sa 55,000ka fans nga nagpunsisok didto sa Tokyo Dome sa Japan niadtong Sabado sa gabii, Mayo 2.

Uban sa hait niyang abilidad, ang 33-anyos nga gibansagang "Monster" mipakita og igong katakos aron madepensahan ang iyang undisputed super bantamweight world titles ug patilawon si Nakatani sa kapait sa kapidihan sa unang higayon.

Nindot ang gipakitang away sa duha ka boksidor sa tibuok nga bahin sa 12 ka hugna nilang kumbati apan sa katapusan ang tulo ka mga judges mi-iskor og 116-112, 115-113 ug 116-112 pabor ni Inoue, nga miinat sa perpekto niyang rekord ngadto sa 33-0 uban ang 27 knockouts.

Mao kini ang ikapitong higayon nga si Inoue milampos pagpanalipod sa upat niya ka mga korona sa WBC, WBO, IBF ug WBA.

Samtang si Nakatani, nga kaduha pa lamang miaway sa super bantamweight division, natagak sa 32-1 uban ang 24KOs.