SHAABAA Season 29 moarangkada na

CEBU, Philippines —  Ang ika-29 nga season sa Sacred Heart Ateneo Alumni Basketball Athletic Association (SHAABAA) moarangkada na uban ang hugot nga 10 ka duwa nga iskedyul karong adlawa (Domingo, Mayo 3) sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, siyudad sa Mandaue.

Sa dili pa ang mga duwa, usa ka bonggang seremonyas sa pagbukas ang ipahigayon sugod sa alas-10 sa buntag nga pagatambongan sa mga opisyales sa SHAABAA nga gipangulohan sa bag-o nilang presidente nga si Jop Gallardo ug tsirman nga si Jedd Ryan Go. Gipaabot nga mosaksi sab sa tulomanon sila si SHAABAA Board members Afshin Ghassemi, Dr. Bimbo Tequillo, Dr. Andrew Eraso, Martin Dumon, Kit Gocela, Karl de Pio, ug Steven Co, ug treasurer nga si Lloyd Atillo.

Ang pagbalik sa Division A mipasaka og balik sa gidaghanon sa mga entrante ngadto sa 22 ka teams ning season.

Mopakita'g aksiyon sa Division A ang Batch 2K Cares, Batch 2K Core Pacific, 2003, 1996, 2001, ug SHS-AdC Faculty.

Ang Division B gilangkoban sa Batch 2004, 2012, 2005, 2010, 2008, 2013, ug 2006. Mag-ilog alang sa korona sa Division C ang Batch 2018, 2025, 2024, 2021, 2014, 2022, 2015, ug ang labing bata nga migradwar gikan sa Class of 2026.

Moduwa sila og single round robin diin ang Top 6 matag dibisyon motikang sa sunod nga hugna sa tulo ka bulan nga torneyo. Ang Top 2 makaangkon og awtomatik nga luna sa semifinals samtang ang No.3 makigharong sa No.6 ug ang No.4 makig-atbang sa No.5 sa crossover quarterfinals.

Ang nga mananaog moabante sa semis ug dayon sa division championship, nga parehong usa ka best-of-three series.