NUNS-B kampeon sa SGVIL Division 2

MANILA, Philippines — Dumaan sa butas ng karayom ang National University Nazareth School-B bago kinalos ang University of Batangas High School, 33-31, 25-17, 25-23, upang sikwatin ang winner-take-all final crown ng Shakey’s Girls Volleyball Invitational League (SGVIL) Rising Stars Cup Division 2 na nilaro sa La Salle Green Hills Gym, Biyernes.

Ipinakita ng Lady Bullpups ang tibay ng loob nang makipag dikdikan ito sa unang set bago dinomina ang dalawang natitirang frames.

Umiskor si Keera Talabut ng 14 points mula sa 13 kills at isang service ace para pamunuan ang NUNS-B sa perfect 8-0 sweep sa kompetisyon na suportado ng Shakey’s Pizza Parlor, Peri-Peri Charcoal Chicken, Potato Corner, at R and B Milk Tea.

“Naging calm and composed lang kami kasi yun ang uunahin namin sa lahat. Inalis namin yung pressure and outside noise. Pinusuan po namin ‘yung (first) set na yun ang pinaghirapan namin yun kaya naging dominant na kami sa mga sumunod na sets,” ani Talabut.

Tumikada rin sina Ellaine Tayag at Jheiza Giducos ng tig-12 markers sa event na Smart Sports, PusoP.com, Solar Sports Free TV, Mikasa, Asics, Eurotel, Team Rebel Sports, at Rigour Technology bilang technical partners.

“Actually, naging challenging siya kasi maraming mga bata. Thankful ako kay coach Karl (Dimaculangan) kasi binibigyan niya kami ng pointers kung paano gumawa ng program,” ani Lady Bullpups coach Kenan Quitco.

Samantala, nagwagi ang last year’s Division 1 champion NUNS laban Far Eastern University-Diliman, 25-18, 25-21, 25-18 para sikwatin ang bronze medal sa tournament na mapapanod sa live and on-demand via PusoP.com livestream at Solar Sports.