Milcu bronze pinana ng Junior Archers

MANILA, Philippines — Itinakas ng De La Salle Zobel (DLSZ) ang 93-90 overtime laban sa University of Santo Tomas para angkinin ang bronze medal sa 15U division ng 2026 Milcu Sports Got Skills basketball tournament sa Greenhills West Gym sa San Juan City.

Bumandera sina Mikko Noel at David Dizon para pamunuan ang Junior Archers na naghahanda sa darating na Season 89 ng  University Athletic Association of the Philippines (UAAP) U16 junior high school boys’ event sa Agosto.

Umiskor si Noel ng 33 points bago na-foul out sa dulo ng regulation period, habang kinamada ni Dizon ang walo sa 11 points ng Junior Archers sa overtime para sa paglusot ng tropa nina head coach Hyram Bagatsing at deputies LA Revilla, David Webb at Thomas Torres.

Tumulong din sa kampanya ng Junior Archers sa age-group tourney sina Alfonso Mercado, Andrei Francisco, Iggy de Lara at Enzo Montes.

Nagtala si Mercado ng 17 markers at may 12 points si Francisco.

Bago takasan ang Tiger Cubs ay winalis muna ng Junior Archers ang seven-game eliminations hanggang malasap ang 71-74 kabiguan sa San Beda University-Rizal sa semifinals.

Talo ang Red Cubs sa San Beda-Alabang sa kanilang title match, 76-54.