2nd Alcoy Black Shama fishing tourney sa Mayo
CEBU, Philippines — Laing kulbahinam nga sport fishing event ang masaksihan sa lungsod sa Alcoy sunod bulan. Ang mga hobby anglers, lokal man o gikan sa laing probinsya, mag-abot alang sa 2nd Black Shama Fishing Tournament nga gikatakda karong Mayo 16-17.
Ang maong kalihukan gipaluyohan sa Alcoy LGU ug lokal nga mga patigayon aron masubli ang kalamposan nga ilang natagamtaman sa miaging tuig diin sila nakadani og kapinsa 100 ka partisipante dili lang gikan sa Cebu apan hasta sab sa Bohol, Negros, Siquijor ug Mindanao. Ang mga kategoriya nga kumbatihan mao ang jigging/trolling ug casting nga nagtangag og premyong P30,000 ug P10,000 sa ma-champion.
Sa jigging/trolling, ang mga anglers mosakay og pumpboats aron didto mamasol sa lawod. Ang mga pumpboats iya sa mga lokal nga mananagat abangan sa mga anglers. Samtang ang mosalmot sa casting o shorecasting category anha manukad sa baybayon sa lungsod aron mamasol.
Ang mga protected marine species sama sa rays, sharks, skates ug pawikan bawal kuhaon ug kinahanglang buhian dayun.
Kadtong makakuha og isdang pinakabug-at og timbang mao ang makampiyon sa matag kategoriya. Ang mga bangkero nga masakyan sa mga mananaog sa jigging category aduna say premyo. Duna say special, major ug minor awards nga ihatag gikan sa mga organizers .
Kadtong gusto moapil gihatagan kutob lamang karong Mayo 8 aron magparehistro. Alang sa dugang detalye, bisitaha ang Black Shama Facebook page.
Ang talagsaong torneyo dili lang mopasundayag sa nindot ug puting baybayon ug pagka-maabiabihon sa mga taga-Alcoy apan mopalambo sab kini sa sport fishing ug malungtaron nga pamaagi sa pagpanagat sa ilang dapit. Banat New Associate Editor
- Latest
















