Cebu greats miyukbo sa San Juan Knights
CEBU, Philippines — Ang Cebu Greats nakatilaw sa una nilang pildi sa Maharlika Pilipinas Basketball League (MPBL) Season 8 sa mga kamot sa San Juan Knights, 73-81, niadtong Huybes, Abril 16, didto sa Cuneta Astrodome sa siyudad sa Pasay.
Labaw ang Cebu og usa ka lugas, 19-18, human sa nag-unang 10 minutos sa aksiyon apan ang San Juan milusad og nagkayong 26-10 rally sa ikaduhang kuwarter aron pagposte og 44-29 nga bentaha sa halftime.
Ang Knights nakasustinir sa ilang kainit ug miabante pa og 19 puntos, 53-34, sa ikatulong kuwarter.
Ang Greats igo lamang nakasikit ngadto sa singko puntos, 73-78, sa 3-pointer ni Ron Dennison apan dili pabor kanila ang oras kay 25 segundos na lang ang nahibilin sa duwa.
Si Gerry Abadiano mihipos og 15 puntos ug duha ka rebounds samtang si Michael Calisaan midugang og 12 puntos ug lima ka rebounds aron ituboy ang Knights ngadto sa ikaduha nilang sagunson nga daog.
Si Mark Meneses nangu sa upat ka Cebu players nga mikadlit og double figures uban ang 17 puntos ug 17 sab ka rebounds.
Si Brian Heruela mi-iskor og 12 puntos uban ang lima ka rebounds ug upat ka assists samtang sila si Wowie Escosio ug Paul Desiderio nagkumboya'g 21 puntos, walo ka rebounds ug tulo ka assists apan nakawang ang ilang paningkamot kay ang Greats natagak sa 1-1.
- Latest
