Final Four spot target ng Adamson
MANILA, Philippines — Puntirya ng Adamson University na masilo ang pangatlong ticket sa Final Four sa pagharap nila sa Far Eastern University sa UAAP Season 88 women’s volleyball tournament na lalaruin sa UST Quadricentennial Pavilion, Manila.
Magbabakbakan ang Adamson at FEU ngayong alas-5 ng hapon, habang magtatapat ang Ateneo de Manila at University of the East sa alas-11 ng umaga.
Solo sa third spot ng team standings ang Lady Falcons tangan ang 8-5 karta at kailangan nilang maipanalo ang huling laro nila sa 14-game elimination round para makatiyak na papalo sila ng bola sa semifinals.
Muling ipaparada ng Adamson ang kamador nilang si Shaina Marie Nitura para ikahon ang pangatlong sunod na panalo at madala sa susunod na phase ang mataas na kumpiyansa.
Tumikada si Nitura ng 26 points mula sa 23 kills at tatlong blocks nang kalusin ng Lady Falcons ang University of the Philippines Fighting Maroons, 25-19, 25-18, 25-16.
Makakatuwang ni Nitura sa opensa si Marie Joy Aseo na nagtala ng 10 markers kasama ang limang spikes, apat na service aces at isang block sa huli nilang laban.
Pero tiyak na mapapalaban sila dahil nais din ng Lady Tamaraws na makausad sa Final Four, nasa pang-apat na puwesto ang FEU na may 7-5 baraha kapareho ng University of Sto. Tomas.
Kaya asahang parehong ibubuhos ng Adamson at FEU ang kanilang lakas dahil maging ang UST ay malaki rin ang tsansa na pumalo ng bola sa semis.
- Latest
