Mortashield kampiyon sa CABC 3rd Mortabond Cup

CEBU, Philippines — Ang Mortashield mibuntog sa Mortapaint Pro, 69-64, aron sakmiton ang kampiyonato sa Cebu Architects Basketball Club (CABC) 3rd Mortabond Cup sa Game Changer Sports Facility sa siyudad sa Mandaue ning bag-ohay pa lamang.

Sila si Dexsel Caadan, Reddick Palmitos ug Miggy Aparri ang mibandera sa Mortashield ngadto sa gihandum nilang korona.

Si Caadan mipupo og 15 puntos, walo ka rebounds, duha ka assists ug usa ka steal alang sa Mortashield, nga naggukod kanunay sa halos tibuok nga bahin sa tinagakay nga sangka.

Alkansi pa gihapon ang Mortashield og dos puntos, 52-54, sa katapusang singko minutos apan gitak-op nila ang duwa pinaagi sa nagkayong 17-10 rally aron paglakaw ngadto sa singko puntos nga kadaogan.

Si Palmitos mikimada og 13 puntos, usa ka rebound ug duha ka steals samtang si Aparri miposte og double-double nga 11 puntos ug 13 ka rebounds uban ang tulo ka assists, usa ka block ug usa ka steal alang sa Mortashield.

Si John Therese Buhawe mipaulbo og 26 puntos uban ang unom ka rebounds ug usa ka steal samtang si Joseph Layar midugang og 16 puntos, upat ka rebounds ug tulo ka steals apan wala mosaler ang impresibo nilang salida alang sa Mortapaint. Sa bugno alang sa ikatulong dapit, si Justin Aspacio miharos og 28 puntos, pito ka rebounds ug walo ka assists samtang si Jay Devenadera mirehistro og double-double nga 25 puntos ug 17 ka rebounds uban ang tulo ka assists ug tulo sab ka blocks aron panguloghan ang Mortaseal Flexi ngadto sa 107-86 nga paglampaso sa Duraplas Lite.

Mikuha sab og atensiyon si Criz Matunog uban ang 21 puntos, walo ka rebounds ug usa ka steal samtang si Klein Baladya miamot og 14 puntos, siyam ka rebounds, pito ka assists ug usa ka steal alang sa Mortaseal.