SHAABAA Season 29 MOSIKAD sa Mayo 3

CEBU, Philippines — Miabot sa 22 ka teams nga gikatag sa tulo ka dibisyon ang mopakita'g aksiyon sa Sacred Heart Ateneo Alumni Basketball Athletic Association (SHAABAA) Season 29 nga gikatakdang sugdan karong Mayo 3 sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, dakbayan sa Mandaue.

Ang bag-ong season sa labing dako ug labing karaan nga liga alang sa mga alumni sa usa ka tunghaan dinhi sa Sugbo pormal nga gilusad sa mga opisyales sa SHAABAA nga gipangulohan sa tsirman nilang si Jedd Ryan Go ug presidente nga si Jop Gallardo atol sa tradisyonal nilang Media Day niadtong weekend sa First 5 Sports Lounge and Cafe.

Mitambong sab sila si SHAABAA Board members Dr. Bimbo Tequillo, Dr. Andrew Eraso, Martin Dumon, Kit Gocela, Karl de Pio, and Steven Co, treasurer Lloyd Atillo, ug commissioner Atty. Boyet Velez.

"One of our goals is the return of Division A this season and we've very happy we achieved it," matud pa ni Gallardo sa Batch 2001 Silver Jubilarians. "We are looking forward to a fun-filled yet highly competitive action on the court."

Ang Division A gilangkoban sa Batch 2K Cares, Batch 2K Core Pacific, 2003, 1996, 2001, ug SHS-AdC Faculty.

Magilog sa korona sa Division B ang Batch 2004, 2012, 2005, 2010, 2008, 2013, ug 2006.

Samtang magbugno alang sa titulo sa Division C ang Batch 2018, 2025, 2024, 2021, 2014, 2022, 2015, ug ang labing bata nga mga migradwar gikan sa Class of 2026. Moduwa sila og single round robin diin ang Top 6 matag dibisyon motikang sa sunod nga hugna sa tulo ka bulan nga torneyo.

Ang Top 2 makaangkon og awtomatik nga luna sa semifinals samtang ang No.3 makigharong sa No.6 ug ang No.4 makig-atbang sa No.5 sa crossover quarterfinals.

Ang nga mananaog moabante sa semis ug dayon sa division championship, nga parehong usa ka best-of-three series.