Junior Lady Altas target ang back-to-back crown sa NCAA Season 102

MANILA, Philippines — Ang back-to-back crown ang target ng  University of Perpetual Help System DALTA sa susunod na NCAA Season 102 girls’ volleyball tournament.

Kumpiyansa si Coach of the Year Sandy Rieta na magagawa ito ng kanyang Junior Lady Altas dahil tanging si team captain at setter Jasmine Monte ang ga-graduate.

Si Monte ay aakyat sa Lady Altas.

Tinanggap ng Junior Lady Altas ang eleganteng NCAA Season 101 glass trophy at ang mga individual awards nina Monte (Best Setter), Janine Espiritu (Best Libero, Sherrie Rose Acosta (Best Opposite Hitter), Ramiel Panganiban (Best Middle Blocker) at Elizha Sildo (Finals MVP).

Si Catherine Chu ng runner-up Arellano University Baby Chiefs ang hinirang na Season MVP.

Ayon kay Rieta, sina Acosta, Panganiban, Sildo, Isabel Baser at Janine Espiritu ay may mga playing years pa para sa Junior Lady Altas.

May mga bagong hugot rin ang tropa.

Tinalo ng Junior Lady Altas ang Baby Chiefs, 2-1, sa kanilang best-of-three championship series para pagreynahan ang NCAA Season 101.