Magsayo eksplosibo  sa iyang lightweight debut

CEBU, Philippines — Ang Pinoyng boksidor nga si Mark Magsayo mihimo dayon og impresyon sa iyang lightweight debut ingon man sa bag-o niyang promoter nga Zuffa Boxing.

Kini human gikulata sa kanhi featherweight world champion nga si Magsayo ang kontra niining si Feargal McCrory sa Ireland kagahapong adlawa didto sa Meta Apex, Las Vegas.

Mas maayo ug gamhanan ra kaayo si Magsayo alang ni McCrory, nga gihimong punching bag sa Pinoy gikan sa pagsugod sa away nga milanat lamang og lima ka hugna.

Opisyal nga natapos ang sangka sa oras nga 21 segundos sa ikalimang hugna human ang corner ni McCrory misenyas sa reperi nga undangon na ang away.

Mipalag niini si McCrory bisan og gidabo-dabo na siya og kulata ni Magsayo ug klarong way padaog.

Gidayeg hinoon sa 3o-anyos nga siMagsayo si McCrory sa gipakita niining kaisog.

“Kudos to my opponent, he’s a good fighter,” matud pa ni Magsayo, nga nagkupot na karon og 29-2 rekord uban ang 18KOs. Si McCrory natagak sa 17-2 uban ang 9KOs.

Human sa iyang kadaogan, si Magsayo way kurat nga namahayag nga iyang gukdon ang mga maayong boksidor sa lightweight division.

“There are many great fighters at lightweight, but I’m the best,” buhagay pa sa garbo sa dakbayan sa Tagbilaran.